بين استقالة الرݣراݣي ومحاسبة المسؤولين : فين غادين بهاد التناقض؟
غريب هاد التناقض اللي كنعيشوه فالمغرب، غير كيخسر المنتخب شي ماتش،
بحال هاد الأخير مع مالي، الدنيا كتقلب وكلشي كايهضر على الموضوع لدرجة كاتشوف فقط مواضيع متعلقة بهاد بالكوورة ، وكلشي كيولي يفهم فالتاكتيك والتبديلات وكيطالب برحيل وليد الرݣراݣي والاستقالة ديالو حيت ما فرحناش فديك تسعين دقيقة.
ولكن المار فهادشي هو أن هاد النفس الحارة وهاد الانتقادات القاصحة مكنشوفوهاش ملي كيوصل الأمر للناس اللي شادين التسيير ديال البلاد وكيدبرو شؤون شعب كامل من طنجة لكويرة. كنشوفو فشل واضح فبزاف ديال القطاعات، من الصحة اللي مريضة للتعليم اللي واحل لغلاء المعيشة اللي كوى الدرويش، ومع ذلك كيبقى السكات هو سيد الموقف، وما كنسمعوش هادوك الأصوات اللي ناضت كتغوت على كورة كطالب بمحاسبة ولا استقالة المسؤولين اللي كيدبرو حياتنا اليومية.
خاصنا نسولو راسنا علاش ساهل علينا نطالبو برحيل مدرب ديال الكورة حيت غلط فشي تغيير، وصعيب علينا ننتقدو وزير ولا مسؤول فشل فمهام اللي كتمس الخبز ديالنا ومستقبل ولادنا. ماتش ديال الكورة راه فالاخير كيبقى غير فرجة، وخا نربحو ولا نخسرو حياتنا مغتغيرش بزاف، ولكن تدبير الشأن العام هو اللي كيحدد واش غنعيشو بكرامة ولا غنبقاو واحلين مع الزيادات والمشاكل. الطاقة اللي كنضيعو فانتقاد ديال الرݣراݣي والمنتخب، كون غير وجهنا ربع منها للمطالبة بحقوقنا ومحاسبة اللي كيسيرو البلاد،
كون راه بزاف ديال الحوايج تبدلو للأحسن. الوقت وصل باش نعرفو بلي راه كورة مجرد لعبة، ولكن تسيير البلاد راه أمانة ومسؤولية كبيرة، واللي فشل فيها خاصو يمشي بحالو تماما كيفما كنطالبو من المدرب نهار كيخسر الماتش.
الحاج نعينيعة
