📢 الألتراس يعلن ” حرب الهوية ” : قميص الرجاء خط أحمر.. والتعاقد مع “كوكاكولا” خيانة للمبادئ والقضية.

ألتراس الرجاء: القميص مقدّس… و”تلطيخو” بكوكاكولا خيانة جماهيرية أصدرت «ألتراس الرجاء البيضاوي» بياناً يمكن اختصاره في جملة واحدة: الجمهور ماشي لعبة، والرجاء ماشي لوحة إشهار كتدار كيف بغات الشركات. المجموعات خرجات بصوت عالي وقدّامات الجميع، وقالت إن التعاقد الجديد بين النادي وشركة «كوكاكولا» ما كيشبهش الرجاء، وما كيشبهش جمهورها، وما كيمثّلش حتى هاد الهوية اللي كبرات عليها الجماهير منذ عقود. الجمهور، حسب قولهم، هو رأس المال الحقيقي، هو اللي شد الفريق فأسوأ الأيام، وهو اللي دفع من جيبو فكل مبادرة أطلقها المكتب. البيان مشا بعيد، وربط اختيار «كوكاكولا» بمواقف سياسية ثقيلة. وقال إن الشركة، حسب توصيفهم، متهمة بالمشاركة في الاحتلال والتمييز والإبادة. وزاد البلاغ يوضّح أن عندها مصانع فالأراضي الفلسطينية المحتلة والمستوطنات غير القانونية. وهنا الجمهور قالها بشكل مباشر: واش المكتب المسير فاهم شنو كيوقّع؟ واش فكر فالمسؤولية الأخلاقية قبل ما يمدّ يدو للقلم؟ المجموعات ما بقاتش ساكتة، وقالت إن تلطيخ القميص الأخضر بشعار شركة متهمة فقضايا ثقيلة بحال هادي، كيدّي لهوية الرجاء للحيط. اللون الأخضر عند الرجاويين ماشي صباغة، راه جزء من الروح. أما الشعار الإعلاني “حماس جديد غيبدا”، فالبيان وصفو بأنه مستفز، وكيحمل إيحاءات ما يمكنش يتقبّلوها، لا الجمهور، ولا حتى أي واحد عندو احترام للقضية الفلسطينية. ومن تمّ، الجماهير رجعات ذكّرت: القضية الفلسطينية بالنسبة لرجاوي الحقيقي خط أحمر، خط ما كيتمسّش، خط ما كيحتاج حتى تفسير. الجمهور قالها بلا لغة خشب: التعاقد ما غاديش يغيّر شيء فالمبادئ، والشركة اللي كتحاول «تعويض تكلفة مشاركتها في الإبادة» – حسب بيانهم – ما غادي تربح والو من جمهور الرجاء. لأن الرجاوي، كيفما قالو، ما كيستهلكش المنتوج اللي كيجرحو بيه ضمير العالم. وفي النهاية، المجموعات ختمات برسالة فيها الطمأنينة وفيها العصيان. قالت إن هاد الواقعة غادي تزيد الجمهور وحدة وحماس، وغادي تشعل فيه ذاك الحس التاريخي اللي خلا “الكورفا سود” مدرسة فالعناد والوفاء. التعاقدات التجارية غادي تبقى مجرد تفاصيل، أما الهوية، والقضية، وروح الجمهور… فهي عند الرجاويين ما كتبدلها لا شركة ولا عقد.